Transparency International Greenland sunaava?

Transparency International Greenland suliniaqatigiiffiuvoq nunat tamalaat suliniaqatigiiffiat Transparency International suleqatigalugu Kalaallit Nunaanni peqquserluttuliorneq pinaveersaartinniarlugu suliaqartoq.

Oqartussaasoqarfiit paasissutissanik inunnut tamanut isertuussinnginnissaasa annertuumik suliniutigineratigut peqatigiiffiup peqquserluttuliorneq akiorniarpaa aammalu peqquserluttuliornerup suuneranik ajoqutaanillu ilisimasat siaruarterneqarneri suliaralugu. TI-p najoqqutassaasa malinnissaannut peqatigiiffik imminut pisussaaffilerpoq imaaliornikkut: Nammineq suliffiutilinni pisortallu suliniaqatigiiffiini inatsisit, allaffissornikkut suleriaatsit il. il. eqqummaarilluni malinnaavigalugit, taamaaliornikkut pissusilersuutit peqquserluttuliornermik pilersitsisinnaasut imaluunniit suusupaginnilersitsisinnaasut eqqumaffiginiarlugit, taavalu aamma sanngeequtaasinnaasunik uparuaasarnikkut aammalu pitsanngorsaataasinnaasunik siunnersuuteqartarnikkut.

Peqquserluttuliorneq sunaava?

Peqquserluttuliorneq tassaavoq iluanaarniutigiinnarlugu oqartussaassusiligaanermik atornerluineq.

Taamaattumik peqquserluttuliuutit assigiinngiiaartorpassuusinnaapput. Assersuutitut taaneqarsinnaapput akiliilluni peqquserlutsitsisarnerit, toqqaannartumik peqquserloriaatsitut taaneqarluarsinnaasut. Politikkikkulluunniit tapiissutitut tunniuttakkat, ajunngitsuliuutitut tunissutaasartut, tapiissutit, soqutigisatigut nikingassutit, tunissutit aliikkusersuinerilluunniit, nalorninartumi inisseqqasinnaasut, allaat nalorninartunngorluni ilumut peqquserluutiviunersut nalunarsilluni erseqqivinnani. Peqquserluutit kiinnat assigiinngitsorpassuusinnaallutik, ataatsimik ataatsimoorussaqarput, ilisarnaatigivaat tamakkerlutik inuiaqatigiinni naligiinnginnermik pilersitsisarput, imaammat innuttat aalajangersimasuinnaat – attuumassuteqarfitik aqqutigalugit imaluunniit immaqa akiliillutik – periarfissanik peqalertarmata, inuiaqatigiinni nalinginnaasumik allat periarfissaqarfiginngisaannut. Taamaattoqartarnerisigut aamma illit peqquserluuteqartarnernut arlaatigut kalluagaasarputit.

Pasinapiluttumik kalerriineq

Inuiaqatigiinni pasinapiluttumik kalerriisut pisariaqartippagut

Kalaallit Nunaanni pasinapiluttumik kalerriisunik illersuineq pillugu Inatsisartut inatsisaat januaarip tallimaat 2025 aallarnerfigalugu atuutilissaaq. Pisortaqarfinnut tamaginnut namminersortunullu tamanut atuutissaaq, avataani aaqqissuussamut ilanngutissapput. Namminersorlutilli suliffiutillit 100-t ataallugit sulisullit ilanngunnissaminnut aaqqissuussinissaminnullu juulip aallaqqaataat 2025 ilanngunnissaminnut killigivaat.

Inatsit pilersikkusunneqalersimavoq paasinarsiartulermat qanorluunniit nakkutiginnilluartigigaluaraanni misissueqqissaarluartartigigaluaraanniluunniit naammanngitsut, nunatsinni pisuussutitsinnik tamakkiisumik illersuiniassagaanni, imaani nunallu qaavani, nuna tamakkerlugumiittut tamaasa eqqarsaatigalugit. Kinaluunniit pisussaavoq ilungersoqataassalluni pisuussutitsinnik paarseqataanissaminut. Inatsisartut inatsisitaarpata, kinaluunniit atorfilittaq innuttaasullumi kikkuugaluit, nakkutilleeqataalissapput eqqunngitsumik peqqusersaartumillu ingerlasoqarpat, inupiluusertoqarpat, kammalaasersorpat allatulluunniit systemimik atornerluippat, toqqissilluni ilisimasaminik takusaminilluunniit isornaatilinnik pissusissamisuunngitsumik toqqaannarluunniit pissutsinik eqqunngivissortunik apuussisinnaalissaaq.

Sulisitsisut inatsit aqqutigalugu pisussaaffiligaapput, ersarissunik paasiuminarsakkanik piuminartunillu sulisuminnut paasissutissiissasut, avataaniittumut whistleblowerinut apuussiffiusartussamut anngussisassasut nalunaarutigerusutaqaraangamik.

Whistleblowerinngorusussinnaallutit eqqarsaateqarpit?

Ullumikkut pasinapiluttumik kalerriisarnerup tungaatigut aaqqissuussanik assigiinngitsunik suliffeqarfiup iluani avataaniluunniit peqartoqareerpoq. Quppersagaaqqat paasissutissiissutit peqquserlunnermut akiuinissaq pillugu kiisalu kommuninut quppersagaliaq (saqqummersitat ataaniittut takukkit) tassani whistleblowerit pillugit paasissutissanik pissarsisinnaavutit, Transparency innersuussuteqarfigerusuppaatit, paasiniassagit suliffippit iluani qanoq ittumik aaqqissuussamik peqartoqarnersoq. Kattuffissinnilu sinniisorsi oqaloqatigalugu, arlaatigut nalornigisaqarsimaguit.

Transparency sulianut inunnut ataasiakkaanut tunngasunut akulerussuunnissaminut pisinnaatitaaffeqanngilaq taamaattumillu ikiuutaasinnaanani, eqqunngitsumik pineqalersimassagaluaruit.

Nutaarsiat