Juunip ulluisa 26-30-nut 2023 Transparency Internationals School on Integrity peqataaffigaara, Litauenimi Vilniusimi ingerlanneqartoq.
Mayada M. Mohamadadi, TIG-mi siulersuisunut ilaasortaq
Sapaatip akunnera taanna tamarmi tiguartisimanarpoq, ileqqorluuteqartarnermut innarligassaanngissutsimullu ilisimasakka ilaartungaatsiarakkit, taassumalu saniatigut suatigut inuttullu attaveqaqatigisinnaasarpassuannik pisaartorlungalu saniatigut ataatsimoorfinnik nutaanik ataavartussanik aamma pisaartorlunga.
Sammisassartai siammasissunngorlugit aaqqissugaasimapput, sumorsuarmut tunngasuullutik. Assersuutigalugu timersornerup silarsuaani ileqqorluutaasarsimasunik eqqartuivugut, whistleblowerinut tunngatillugu inatsiseqarneq, ileqqorluuteqartarnernullu akiuiniarnerni sakkuusinnaasunik tigussaasunik atorluarneqarsinnaasunik sammisaqartinneqarluta. Sammisaqartitsivinni saqqummiunneqartuni uannut tupinnartumik aalaallatsitsinut ilaavoq Fidelia Onoghaifep, Nigeriami Hollandimiut ambassadeqarfianni ileqqorluuteqartoqarneranik apuussereernermi kingorna soraarsitaasimanini oqaluttuarimmagu. Aqqusaarsimasani oqalutturai, qanoq whistlebloweriusimanini kinguneqartitsinersoq, nammineq isumannaatsumik iluarusullunilu inuunissaraluani kisimi eqqorneqaannarani ilagisanngui ilanngullutik eqqugaasimallutik, taanna tusagaq uannut qamuunarujussuaq aalassatsitsillunilu attuingaatsiarpoq. Taanna oqaluttuarsiara Kalaallit Nunaaliaatissavara, qanoq nunatsinnut tulluarsakkamik whistleblowerinut inatsisitigut illersuutaasinnaasunik pilersitsisinnaanissarput eqqarsaatigalugu. Sammisaq alla uannut tiguartiffiusimasoq tassaavoq, pisortatigut innarligassaanngissutsimut tunngasunik, itisiliilluni sammisaqartitsinikkut sungiusarneqarneq Tanya Azuajemit ingerlanneqartoq. Tassani pissarsiaraakka sakkussat tigussaasut ulluinnarni nalaatanut tulluarsarlugit atorneqarsinnaasut. Taakkua saniatigut uannut pissarsiaqaataalluarsimasoq tassaavoq ullaakkut naapeqatigiilluni avitseqatigiittarneq, immikkut tamatta nunagisatsinni sunik qanorlu misigisaqartarsimaneraluta peqquserluuteqartarnerup tungaatigut, tassani aamma oqalugiaateqarlutik saqqummiisimasut ataasiakkaat peqataasarlutik.
Tigussaasumik oqaatigalugu Transparency Internationals School on Integritymi peqataanerma ilisimasassarpassuarnik nutaanik immerpaanga, teoriitiskimik piviusumilu atorluarneqarsinnaasut, sulilluartorsuarnillu eqiingasunik inuusuttunik nunarsuaq tamakkerlugumeersunik attaveqaqateqalerlunga, ilisimasannik avitseqateqarsimavunga, utimuuanillu nammineq Kalaallit Nunatsinni iluaqutaasinnaasussanik ileqqorluuteqartarnernut qanoq ililluta akiusinnaanissatsinnut isumassaasinnaasunik pissarsillunga allarpassuarnillumi.
Transparency Internationals School on Integrity 2023-mi peqataaninni atorluarsinnaasunik ilisimasassanik peqalerpunga, ileqqorluttarnernut tassungalu attuumassuteqarsinnaasunik paasisaqaqaanga pulaffeqarluga, minnerunngitsumillu nunarsuaq tamakkerlugumiik inuppassuarnik naapitaqarpunga attaveqaqatitaartorlungalu, inuit sulilluartorsuit, ataavartumik attaveqaqatigisalikkannik. Misilittagarilikkakka malillugit kinaluunniit ileqqorluuteqartarnernut akiuerusuttoq kiisalu akimut ersarisaateqarnissamut tamallu oqartussaaneerulernissaannut isumaqataasoq, kaammattorusuppara Transparency Schoolimut peqataaleqqullugu – peqqissiminavianngilatit!