Transparency International Greenland siulittaasortaarlunilu siulersuisortaartoq
Sisamanngornermi maajip 28-ani 2020 Transparency International Greenland – TIG – ukiumoortumik ataatsimersuartitsinerani Birita í Dali siulittaasutut nutaatut toqqarneqarpoq. Anita Hoffer 2014-miilli siulittaasuusimasoq 2011-miilli ilaasortaasimasoq maannalu siulittaasut tulliattut ingerlaqqittoq taarserlugu siulittaasunngorpoq. Aammattaaq Anita Hoffer 2011-mi peqatigiiffimmik pilersitseqataavoq taamanililu siulersuisuni ilaasortaalluni. Qullersani taarseraanneq qulakkeerniarlugu peqatigiiffimmilu ammanerusumik periuseqarnissaq siunertaralugu qinigaaffinni tulleriinni marlunni qinigaasoqarsinnaanngitsoq peqatigiiffiup malittarisaani allassimavoq.
Siulittaasunngorlaaq Birita í Dali 33-nik ukiulik Københavns Universitetimi cand.scient.pol-imik ilinniagarpoq Namminersorlutillu Oqartussat ataanni Aalisarnermut, Piniarnermut Nunalerinermullu Naalakkersuisoqarfimmi immikkut siunnersuisutut atorfeqarluni.
”Siulersuisut nutaat suleqatiginissaannut qilanaarpunga, peqatigiillutalu allannguisinnaanerput inuiaqatigiinnilu ammanerusumik periuseqarnerulersitsisinnaanerput upperaara”, siulittaasunngorlaaq Birita í Dali oqarpoq nangillunilu:
”Inuiaqatigiinni taamak mikitigusuni tamatta immitsinnut ilisimasariitsilluta pisortallu taamak annertutigitillugit inuillu ikittuinnaat pissaanermik tigummisaqartillugit ammasumik periuseqarnissaq pingaaruteqarluinnarpoq, tamannalu Transparency International Greenlandip nangillugu sulissutigerusuppaa”, Birita naggasiivoq.
Naliginnaasumik ataatsimeersuarnerup kingorna siulersuisuni ilaasortat ukuupput:
- Birita í Dali, Siulittaasoq, Namminersorlutik Oqartussani immikkut siunnersorti
- Anita Hoffer, Siulittaasup tullia, atorfilinnut pisortaq, INI A/S
- Dora Drechsel, Pisortaq Kalaallit Forsikring A/S
- Klaus Kuch Jensen, Pisortaq, Greenland Oil Spill Response (ilaasortaq nutaaq)
- Sara Olsvig, Phd-nngorniaq
- Karen Heilmann Lennert, siunnersorti, Deloitte (ilaasortaq nutaaq)
- Anja Rindom Bøndergaard, Inatsisartuni Ombudsmandimi inatsisileritooq (ilaasortaq nutaaq)
Sinniisut:
- Naaja Nathanielsen, Pinerluttunik isumaginnittoqarfimmi pisortaq
- Christian P. Jerimiassen, namminersortoq
Ataatsimeersuarnissaq sioqqullugu TIG ilaasortaminik ataatsimiisitsivoq COVID-19 kingunerisimasaanik eqqartueqateqarluni.
Tassani Inuit pisinnaatitaaffii pillugit Siunnersuisoqatigiit siulittaasuat Sara Olsvigip inunnut kingunerisaanik erserissaavoq katerisimaarnissani killiliinerit angalaarsinnaanermullu taamattaaq killiliinerit taakkartorlugit kiisalu inatsisip nukingisaarutaasup pilersinniarnerani unamminartuusimasut eqqartorlugit.
Tulliulluni TI Danmarkimi siulittaasup Jesper Olsenip COVID-19–mi killigititanut akuersaaruminaatsitsineq pisoq ersarissaavigaa. Taannarpiarlu qulequttatut TIG–mi ilaasortanut kingunerisaanik oqallisissiarineqarpoq. Naalisarlugit TIG–p ilaasortaasa uku Naalakkersuisunut innersuussutigiumavai: Aaliangersaaniarnerni ersarinnerusumik takujuminarsakkamik periuseqartarnissaq kiisalu piviusumut tutsissinnaanissaanut qulakkeerinnereersimasarnissaq
- Aaliangersakkani atuutsinneqalertuni allanngortinneqartuniluunniit ersarissumik attaveqatigiittarnissaq aaliangersaatinilu suut toqqammaviusimanersunik ersarissaavigineqartarnissaq
- Avataaneersunik immikkortitsinnginnissaanik qulakkeerinnittarnissaq
- Toqqammavilersukkanik isornartorsiusoqartillugu naalaartarnissaq – siuariiateqarnissamut aqqutissaasinnaasutut tigullugit
- Ingerlaarnermi arlaannaanulluunniit attuumassuteqanngitsumit nalilersuititsinissaq ingerlariaqqinnissamut pitsannguisinnaanermut siunertalimmik
Allamik apeqquteqaqqikkusuttunut uunga [email protected] imaluunniit siulittaasumut Birita í Dalimut oqarasuaat 253834–mut