Nunatsinni pissutsinik isornartoqartillugu oqaatilliisinnaanissamut periarfissiinerunissarput pisariqarpoq
Junip ulluisa 23-t tassaavoq Nunarsuarmi Isornartoqartillugu Oqaatilliisinnaanerup Ullua tamannalu nalliussiniarlugu Transparency International Greenlandip malunnartikkusuppaa inuiaqatigiinni taamaaliorsinnaanerup qanoq pingaaruteqartiginera immikkut sammilaarusullugu. Oqaatilliisinnaassutsip ileqqorlunnnerit aningaasanik tillinnerit pinaveersaartissinnaavai pinngitsoortittarsinnaallugillu pisunik ajortunik uparuaasinnaanermikkut.
Oqaatilliisartut nunarsuarmi tamarmi inuiaqatigiinni ajoqusiutaasinnaasunik akiuiniarnerminni atorfitik, inuussutissarsiutitik ilaannilu allaat inuunertik ulorianartorsiortillugu imminnut pilliutigisinnaasarput.
- Pissutsinik eqqunngitsunik uparuaaniarnermi sapiissuseq annertooq pigisariaqarpoq eqqunngitsunik, pinerluttuliuutinik, namminerlu suliffigisami/kattuffigisami aningaasanilluunniit tillinniartoqartillugu aammalumi upperaarput eqqunngitsuliuutit amerlanerit paasisaasalerumaartut, aaqqissutaasinnaasunik pitsaasunik peqartoqartuuppat toqqissinermik nassataqarsinnaasunik, taamaattoqartuuppat oqaatilliisartut annikilliuuteqalertassanngikkaluarput, taama oqaaseqarpoq Birita Í Dali, Tranperancy international Greenlandip siulittaasua.
Transparency International Greenlandip upperaa, inuiaqatigiinni oqaatilliisinnaatitaasunik peqqinnartumik ingerlalluartumillu periarfissaqartitsineq inuiaqatigiinnut iluaqutissartaqartoq, innuttat ilisimassagaat kimut qanorlu oqaatilliisinnaallutik, imminerminnut annikilliortitsilinngitsumik.
Massakkorpiaq Nunatsinni oqaatilliinissamut ass. peqarpoq, Namminersorlutik Oqartussani atorfilittat oqaatilliisoqarsinnaanissaminnut periarfissaqartitaapput, soorlu eqqunngitsuliortoqartillugu kammaalaatersortoqartillugu allatigulluunniit equngasunik pisoqartillugu.
- Tamanna peqqinnarpoq, tapersersoruminartipparput ajoraluarporli aaqqissuussineq iluminniinnaq isumagisarimmassuk, imaalluni sulisitsisullu oqaatilliisullu akunnerat illersuutitigut eqqanaarsagaanani. Taamaattumik isumaqarpugut, aaqqissuussaq siunertaminut naleqqutinngitsoq, ”illup iluaniiginnarnini pillugu”, taama oqarpoq Birita Í Dali.
Taamaattumillu Transparency International Greenland ima siunnersuuteqarusuppoq:
- Naalakkersuisut/Inatsisartut oqaatilliisinnaatitaanermut inatsisissamik siunnersuusiussasut atuutsitsilissasullu.
- Namminersortut, Kommunit suliffeqarfiillu oqaatilliisinnaatitaanermik avataanik aqunnilimmik eqqussissasut.
- Kinaluunniit, pissutsinik isornaatilinnik pissusilersuutinilluunniit maluginiagalik oqaatiginnittassasoq.
Inussiarnersumik inuulluaqqusilluta
Transparency international Greenland