Tunuliaqutaasoq
Maanna piffissanngulerpoq piginneqatigiiffiit namminersorlutik oqartussanit pigineqartut ukiumoortumik ataatsimeersuarnissaannut.
Tamatumunnga atatillugu Transparency International Greenland-imit (TIG) pissusissamisoortutut isigineqarpoq unamminartut takusartakkatta oqaaseqarfiginissaat, ilanngullugit siulersuisunut ilaasortat akilerneqartarnerisa akimut ersittumik ingerlanneqartarnissaat. Matumani siulersuisunut ilaasortassanik toqqaanerni aammalu qalleraattunik soqutigisaqannginissamik isumannaarinnikkumalluni iliuuserineqarsinnaasut pillugit qisuariaatigut innersuussutigullu saqqummiuppagut.
Transparency International Greenland (TIG) nalunaarusiami piginneqatigiiffinni pisortanit pigineqartuni siulersuisunut ilaasortassanik toqqaanermi suleriaatissatut innersuutinik suliaqarsimavoq. Pisortammi piginneqatigiiffittut ingerlatsivii inuussutissarsiornerup iluani ulluinnarni malunnaatilerujussuupput taamallu pisortat aningaasaqarnerannut annertumik tunngavisseeqataasuullutik.
Kaammattuutit pilersinneqarput Litauenimi Ruslandimilu Transparency Internationalip immikkoortortaqarfii suleqatigalugit. Suleqatigiinnermi ingerlatassatut tunngavigisaq tassaavoq misissuiffigissallugit, qalleraattumik soqutigisaqarfittut navialiffiusinnaasut. Anguniarneqartullu tassaapput taamaattut pisinnaanerit pakkersimaarnissaat aammalu taamaattut ammasumik ingerlanneqarnissaannut malittarisassanik pilersitsinissaq.
Qalleraattumik soqutigisaqarsinnaanerit siulersuisut ataatsimiittarfiini pinngitsoortinneqarsinnaapput
Qalleraattunik soqutigisaqarsinnaanerit akiorumallugit aammalu akimut ersittumik sulinerit annertunerulersikkumallugit, TIG-mit makku kaammattuutigineqarput:
- Siulersuisunut toqqaanerni sulersuisut qanoq toqqarneqartarnerat takuneqarsinnaasunngortinneqartariaqarpoq. Oqartussaaffiusut nittartagaanni erseqqissumik saqqumitinneqartariaqarput, atermik saqqummiussisoqarneraniit toqqaanerup pineranut suleriutsit qanoq ingerlasarneri.
- Aamma ersitsinneqqartariaqarpoq, piginnaasat suut siulersuisuni ilaasortaasut suliamik kivitsisinnaanissaminut pigissagai.
- TIG-p kaammattuutigaa siulersuisunut ilaasortat piginnaaneqarfiisa ammasumik takuneqarsinnaanissaat aammalu takuneqarsinnaatinneqartariaqarluni ilaasortat piginnaaneqarfigisaasa siulersuisullu tamarmiusut iluini qanoq tulluutsigineri.
- Piumasaqaataasariaqarpoq siulersuisunut ilaasortat suliaminnik soqutigisarisaminnillu ammasumik CV-minni ilisimatitsissuteqartarnissaat.
- Siulersuisut avammut ammasunik malittarisassaqartariaqarput ersersitsisunik periutsit suut malinneqassasut, siulersuisunut ilaasortaq qalliisunik soqutigisaqartillugu.
- Ukiumut nalunaarutini ilanngussisoqartariaqarpoq takussutissiisunik siulersuisut piginnaasatigut qanoq akuleriiaagaanerat aammalu qanoq akissarsiaqartinneqarnerat.
- Namminersorlutik Oqartussat kaammattorneqarput ”Pitsaasumik piginneqatigiiffimmik aqutsineq pillugu malittarisassiatik” ingerlaavartumik nutartertassagaat. Maannami atuuttoq 2012-imeersuuvoq ingerlaavartumimmi nutarterisarnikkut isumannaarneqar-sinnaalissagaluarput, malittarisassat nutaat allallu ilanngunneqartarsinnaanissaat.
TIG isumaqarpoq, ammasumik sulinikkut tunngavissaqanngitsumik oqalunnerit pinngitsoortinne-qarsinnaassasut, taamatullu pisartut qulaajarsinnaanissaat eqqortumik ingerlanneqarsinnaasun-ngortinneqassagaluartut. Tamakku tamarmik aaliangiisarnernut atatillugu innuttaasut tatigin-ninnissaannnut qaffassaaqataassapput.
Nalunaarusiaq nittartakkatsinni aaneqarsinnaavoq iserfigalugu www.transparency.gl. Taanna aqqutigalugu aamma peqatigiiffitsinnut iilaasortanngorniartoqarsinnaavoq.
TIG tassaavoq immineq kajumissuseq aallaavigalugu peqatigiiffik, peqquserluttarneq akiorniarlugu paasititsiniaalluni qaammarsaanermik suliaqartoq. Kalaallit Nunaanni TIG Transparency International-ip ataani sumiffigisami immikkoortortaqarfiuvoq. Transparency International-ilu nunanit 100-ut sinnerlugit amerlatigisunit ilaasortaaffigineqarpoq.