Russit oqartussaatitaat upperissagaanni, Alexei Navalny toqukkut qimagussimaneragaavoq februarip ulluisa 16-anni. Peerunnerani nunarsuarmioqataasugut, nipi ersarissoq atorlugu, maligassiuilluni peqquserluttarneq akiorniarlugu sorsuutilimmik, peerunnerani pingaarutilimmik sunniuteqarluarsimasumik annaasaqarpugut. Toqukkut peerunnerani eqqaasinneqarpugut, tamatta immikkut akisussaaffeqartugut immitsinnut paarilluarnissatsinnut, tamat oqartussaanerat kiffaanngissusilimmik isummersorsinnaatitaanerput kiisalu eqqunngitsunut pisunut akersuuteqartuarnissarput. Navalny tassaasimammat inuit tuusintilikkaat ilaat inuit pisinnaatitaaffiinik illersuisutut, peqquserluttarnernullu akiuiniartartut, siuttut ilaattut, tusagassiortullu sapiitsut, nunarsuarmi sumi tamani parnaarussaaqqasimasut ilaat. Ajoraluaqisumillu maannakkut peerutereersimalersup, eqqaaneqarnera ataqqinartuuli.
Peqquserluttarnermut akerliussuseq uunga uniinnassanngilaq. Ruslandimi aliasunneq avammut takuteqqusaanngilaq misiginneqataaqqusaanngilaq isummersuutaaluunniit isumaqataaffigeqqusaanngillat. Taamaakkaluartoq takuagut, aliasullutik misiginneqataallutik tapersersortaatut sassartoqartoq. Malugivarput, pisaanilissuit ersissuteqartut, ilami aamma sooq inuit naasortaliisut paarnaarutissagamikkit, toqusimasumik eqqaaniaammata? Navalny Kremlimi peqquserluuteqartoqarnera Putinillu pissaanermik atornerluisarneri, oqaasinnguiffigisarnikuuvai. Ukiorpassuarni nunani allaniiginnarluni akerliuffigalugu ingerlassimasinnaagaluarlugu, toqqarnikuuvaa angerlarnissani isummersuutinilu pillugit parnaarussaajartorluni.
Transparency International nunarsuaq tamakkerlugu kattuffiuvoq, peqquserluttarnernik akiuiniarluni sulissuteqartoq, sumiluunniit sutigullu tamatigut akiuiniartuulluni. Nunarsuaq tamakkerlugumi 100-t sinnerlugit immikkoortortaqarpoq. Ruslandimi aamma immikkoortortaqarnikuugaluarpoq, taannali ukiup ataatsip matuma siorna oqartussanit matuneqarpoq. Nunarsuaq tamakkerlugu immikkortortarpassuit ataatsimoorlutik nukittunerujussuupput nunami immikkoortortamut ataatsinnguarmut naleqqiullugu. Tamat oqartussaanerat Nunarsuaq tamakkerlugu tapersersorneqarnissaa pisariaqarpoq. Nunani killerni nunat tamat oqartussaaqataanerat tunngavigalugu naalakkersuinikkut ingerlatsisut tassuunatigut annertuumik akisussaaffeqarput, taamaakkaluaq nunat mikinerusut aammattaaq oqartussaassuseqaqataapput. Uangalu illillu aamma akisussaaffeqarpugut. Navalnyp toqunera tamaangaannartillugu asuliinnartissanngilarput.