Aammaloorluni Transparency International Greenland pitsaassutsimigut nersualaagaavoq
Transparency International 100-t sinnerlugit immikkoortortaqarpoq, tamakkerlutik sulissutigivaat akimut ersarissaasarnissat kiisalu peqquserluuteqartarnerit akiorniarneqarnissaat. Kattufferujussuarmi pitsaassutsip illersugaasinnaassutsillu qaffasissuunissaasa tungaasigut qulakkeerinninnissaq pillugu, ukiut pingasukkaarlugit nunarsuarmi immikkoortortaqarfiit misissuiffigineqartarput. Misissuiffigineqareernermi immikkoortortata akuerisaasinnaasimasut akuersissumik tunineqartarput.
Ukioq manna misissuiffineqarnissaminut tullinnguutsinneqartunut ilaasimavoq Transparency International Greenland. Misissuiffigineqarnermut atasumik TIG qanoq nunarsuaq tamakkerlugu peqatigiiffiup iliuusissiaanut peqataatigisimanertik malinnitsiginertik suliatigullu ingerlassamikkut nalunaarusiortussaasimavoq. Saniatigut TIG-p uppernarsartussaasimavaa politikkikut aningaasaqarnikkullu sumulluunniit attuumassuteqannginnertik.
TIG-mut misissuiffigineqarneq iluatsippoq taamaalilluni akuerisaaqqippoq. Akuersissutip uppernarsarpaa, kattuffiup naleqartitaanik ileqqorisaarutaanillu, malinnittuusimanera.
”Nuannaarutigeqaarput tulluusimaarutigeqalugulu kattuffipput, naleqartitatigut ileqqorissaarutitigullu nunarsuup sinnerani atuuttunut, naammassinnittutut nalilerneqarmat. Akuerisaanissamut ilaatigut piumasaqataavoq, aningaasaqarnikkut ingerlatsilluarnissamut pitsaassutsimullu piumasaqaatinut annertuunut naammassinninnissarput, taamatullu katuffiup aningaasaataannik isumaginninnerput. Tamanna kattuffitta aningaasaateqarfinnit aningaasalersorneqarneranut peqquteqaannanngilaq, siunertaraagummi aningaasanik ileqqorissaartumik aqutsisoqarnissaa peqquserlullunilu iluanaarniarnermik akiuineq. Siulersuisut peqatigalugit pissaanermik atornerluineq aammalu peqquserlulluni iluanaarniarneq akiorniarlugit suliniteqarnitta ingerlateqqinnissaa qilanaaraara”, taama oqarpoq Inuk Lundblad, Transparency International Greenlandimi siulittaasoq.
TIG siullermeerluni 2015-mi akuerisaanikuuvoq, taamanernilli ukiut pingasukkaarlugit misissuigifigineqartarpoq akuerisaaqqittuaannarlunilu. Nunarsuarmi immikkoortortaqarfittut inissisimanissani pigiinnassaguniuk pingaaruteqarpoq, ilaasortaqarnikkut ingerlalluarnissaq ilaasortallu amerliartornissaat kiisalu aningaasaateqarfinnik tapiissutisisarnerit pissusissamisoortuunissaat naggataatigullu siulersuisut kajumissusertik malillugu sullissisuunissaat sakkortuumillu ileqqorissaartuunissamik pigisaqarnissaat. TIG-p 2021-2025-mut iliuusissiamini anguniagaraa, Namminersortut, kommuunit, suliffeqarfiit namminersortut kiisalu innuttat ulluinnaat peqquserluutinik imaqassanngitsoq.
Akuerisaasimanermut uppernarsaat TIG-p nittartagaani www. transparency.gl-mi takuneqarsinnaavoq.