Nunarsuarmi tamarmi pisussaaffinnik tigusinerit suliniuteqarnerillu pisariaqarput nunarsuarmi anguniakkat iluatsinneqassappata.

Pingasunngormat 15. august CSR Greenland, Sulisitsisut (GE) aammalu Transparency International Greenland peqatigalugit, ataatsimeersuartitsipput sammillugu qanoq iliorluni Kalaallit Nunaanni suliffeqarfiit innuttaasullu nungusaataanngitsumik ineriartortitsineq pillugu nunarsuaq tamakkerlugu anguniagaasut pilersinnissaat suleqatigiissutigiissutigisinnaagaat.

Nunarsuaq tamakkerlugu anguniagaasut 17-iupput, taakkulu aqqutigalugit anguniarneqarluni nunarsuarmi innuttaasut tamarmiusut toqqissisimatilernissaat nungusaataanngitsumillu ineriartortitsinissani peqataatinnissaat. Transparency International Greenlandip tungaanit immikkut qitiutillugit sammineqarpoq anguniakkani normu 16-iusoq  ”Eqqissineq, naapertuilluarneq kiisalu suliffeqarfiit qajannaatsut”. Immikkoortumi tassani sammineqarput peqqarniisaartarnerit allatullu sakkortuuliortarnerit akiornissaat, taamatut iliornikkut innuttaasut assigiissumik naapertuilluartumillu pineqartarnissaat angujumaneqarluni aamma angujumaneqarluni naalakkersuinikkut pitsaasumik aaliangiisarnernilu akimut ersittumik suleriaaseqarnissaq.

Naallu Kalaallit Nunaat allanut sanillullugu annertunerusumik peqquserlunniarfiusutut taasassaanngikkaluartoq, pisariaqarpoq akimut ersittumik sulinermik siuarsaanissaq aammalu inatsisiliornikkut allaffissorlunilu ingerlatsinikkut avammut nittarsaassinissaq peqquserlunniarsinnaaneq akiorneqarmat. Ukioq 2016 Kalaallit Nunaat nunarsuarmi peqquserlunniartarnernik sanilliussuutaasinnaasumik uuttuusiornermi peqataavoq, taassanilu maluginiagassaavoq innuttaasut akornanni inuit pingasuugaangata marluk isumaqartut, naalakkersuisut peqquserlunniartarneq akiorniarlugu annikippallaamik suliniartut.  Taamatut eqqarsarneq pisortat ingerlatsiviinik tatiginninnginnermut aallarniutaasinnaavoq taamatullu pisoqarpat tamanna inuiaqatigiinni inissisimanermut mingutsiterutaalissaaq.

Taamaattumik ineriartortinneqartariaqarpoq, paasinninnerulersitsinissaq NGO-t ilaatigut isornartorsiuillutillu inatsisiliotnikkut sanngeequtinik pitsaanngitsumillu ingerlatsinernik uparuartuisariaqartarnerat pisariaqartarmat.

Transparency International Greenlandillu tikkuarpaa, malunnarsiartormat nunap iluani sammisat, nunarsuaq tamakkerlugu akisussaaffeqarfigisatsinnit, salliutinneqariartortartut.  Oqallinnernimi qitiusaqaat nunatta iluani pissutsit taamatullu ingerlasoqaannassappat nunatta avataani pisartut suusupagineqarpallaalersinnaapput.

Tassalu nunarsuaq tamakkerlugu anguniagaasut iluatsittumik peqataaffigineqassappata, taava pisariaqarpoq avataani ingerlasunut soqutiginninnerunissaq. TIG-mit inassutigiumaneqarpoq, Nunatta aallarniutigalugu FNip peqquserlutsaaliuinissamik isumaqatigiissutaanut ilanngunnissaa.