Peqquserluttuliorneq tassaannaanngilaq aningaasat allakkat puuannut kajortumut ikilllugit inummiit inummut tunniunneqartartut, allarpassuartigulli saqqummersinnaasarluni. Quppernermi matumani peqquserluttulioriaatsit assigiinngitsut allaaserineqarput.

Akiliilluni peqquserlutsitsineq:

Peqquserluttuliorneq eqqartorneqaraangat amerlanerit toqqaannartumik akiliilluni peqquserlutsitsineq eqqarsaatigisarpaat, pissutsini nalinginnaasuni pisassarinngisaraluamik pissarsiniarluni kiffartuunneqarnissaq anguniarlugu akiliineq eqqarsaatigineqartarluni.

Aningaasanik neqitaqarluni aqilisaaneq:

Aqilisaaneq tassaavoq suliassat eqaannerusumik ingerlanissaat sukkanerusumilu piviusunngornissaat anguniarlugu assersuutigalugu atorfilittanut aningaasanik tunissuteqarneq.

Tunissutit aliikkusersuinerillu:

Tunissutit aliikkusersuinissamullu neqerooruteqarneq nalinginnaasorujussuupput atorneqartorujussuullutillu, siunissami suleqatissanut suleqatigeriikkanullu ajunngitsumik attaveqarnissaq qulakkeerniarlugu atorneqartarlutik. Ingasaannagu taamaaliortarneq isornartoqanngilaq. Tunissutilli aliikkusersuinerillu annertuserujussuarpata tamanna akiliilluni peqquserlutsitsinerusinnaavoq, tassami akiliisup akilikkaminit kiffartuunneqarnissani naatsorsuutigisarmagu.

Soqutigisanik aporaatsitsineq:

Soqutigisanik aporaatsitsisoqarnera pisuni amerlasuuni suussusersiuminaassinnaavoq, tassami malunnaarsaaqqissaarluni peqquserluttuliornerusarami. Taamatut pisoqartarpoq inuttut atukkat soqutigisallu salliullugit suliffeqarfiit imaluunniit pisortat suliffeqarfiutaasa soqutigisai tunulluinneqaraangata.

Iluaqutissiuinissaq siunertaralugu iliuuseqarnermi tunissuteqarnerit aningaasanillu tapersiinerit:

Iluaqutissiuinissaq siunertaralugu iliuuseqarnermi tunissuteqarnerit aningaasanillu tapersiinerit piviusorsiortumik eqqarsassagaanni namminissarsiornani taama iliortoqartanngilaq, tunissuteqarnernili tapersiinernilu nittarsaanneqarnissaq imaluunniit suliffeqarfiup akisussaassuseqartutut inuiaqatigiinnullu iluaqutaasutut nittarsaanneqarneratigut iluaqusigaanissaq naatsorsuutigineqartarluni. Tamanna immini ajornartorsiutaanngilaq, paarlattuanilli tunissuteqarnikkut aningaasaliinikkullu akineqarluni kiffartuunneqarnissaq naatsorsuutigigaanni peqquserluttuliorneq pisarpoq, nittarsaanneqarnissaq allanullu naleqqersuunneqarnissaq siunertaralugu aningaasat tunniunneqarpata.

Naalakkersuinermik sulialinnut tunissutit:

Suliffeqarfiit imaluunniit inuinnaat naalakkersuinermik sulialinnut tunissuteqartarnerat soorunami inerteqqutaanngilaq akuersaarneqarsinnaalluarlunilu. Peqquserluttuliornertulli isigineqarsinnaapput partiimit imaluunniit naalakkersuinermi suliaqartunit ataasiakkaannit kiffartuunneqarniarluni piffissani aalajangersimasuni tunissutaasartut. Taamaattumik pingaartuuvoq kia sunut atugassatut kimut tunissuteqartarnerata ammasumik saqqummiunneqartarnissaa, taamaaliornikkut nalorninarunnaarsillugu tunissuteqarneq kiffartuunneqarnissaq naatsorsutigalugu pisimanngitsoq.