Transparency International Greenlandip suliniutigaa inuiaqatigiinni kalaallini peqquserluttuliortarnerup pinaveersaartinnissaa aammalu peqquserluttuliornerup sunniutipilugisinnaasaasa suunerisa paasisitsiniutiginissaat.
“Peqquserluttuliorneq tassaavoq iluanaarniutigiinnarlugu oqartussaassusiligaanermik atornerluineq. Kikkulluunniit inuunermikkut, pilersorneqarnermikkut pilluarnermikkullu ajoquserneqartarnerat oqartussaasutut inissisimanermik atornilluilluni inuit kiffaanngissusiiagaaneqarangata peqquserluttuliorneq pisarpoq”
www.transparency.org
Taamaattumik peqquserluttuliorneq assigiinngitsorpassuartigut saqqummersinnaasarpoq. Toqqaannartumik peqquserluttuliornermut assersuutigineqarsinnaapput akiliilluni peqquserlutsitsineq aningaasanillu neqitaqarluni aqilisaaneq. Imaluunniit naalakkersuinikkut suliaqartunut tunissuteqarnerit, iluaqutissiuinissaq siunertaralugu iliuuseqarnermi tunissuteqarnerit, aningaasanik tarpersiinerit, soqutigisanik aporaatsitsinerit, tunissutit imaluunniit aliikkusersuineq, tassaasinnaapput ilumut peqquserluttuliortoqarneranik amerlasuutigut nalornisitsisartut. Peqquserluttuliorneq assigiinngitsunik sakkortussuseqarsinnaasarpoq, ataatsimoorussaali tassaavoq inuiaqatigiinni naligiinnginnermik pilersitsisarnera, tamatumunnga peqqutaasarpoq attavigisat aqqutigalugit imaluunniit akiliinikkut inuiaqatigiinni innuttaasunut tamanut atuutinngitsunik pitsaanerusunik periarfissaqalersarneq. Taamaattumik peqquserluttuliorneq aamma ilinnut tunngavoq!
Sooq Transparency International Greenland pisariaqarpa?
Kalaallit Nunaanni aningaasarsioriaatsip allanngorujussuarnissaa ilimagineqarsinnaavoq, tassami aatsitassanik ikummatissanillu iluaquteqarluni aningaasarsiulernissaq qanilliartupiloorpoq. Transparency Internationalip nunani allani misissuinerisa takutippaat uuliasiorneq aatsitassarsiornerlu tassarpiaasut peqquserluttuliornissamut nunarsuarmi navianartorsiorfiunerpaat. Taamaattumik aningaasaliisartut nutaat taakkulu navianartorsiortitsilersinnaanerannut kalaallit inuiaqatigiit piareersimanissaat pingaaruteqarpoq.
Aamma tunngaviatigut qulakkerneqartariaqarpoq aningaasarsiornikkut siuariartornerup inuiaqatigiinnut tamanut iluaqutaanissaa. FN naapertorlugu peqquserluttuliorneq tassaavoq aningaasatigut suiariartornissamut akornutaanerpaaq, tassami peqquserluttuliorluni akiliinikkut isumaqatigiissusiortarneq allatigullu akiliilluni peqquserlutsitsisarneq niueqatigiinnermi unammilleqatigiinnermut akornutaasarpoq, naak peqquserluttuliortoqartanngikkaluarpat nalinginnaasumik inuussutissarsiorneq pituttorsimanngitsumillu unammilleqatigiinneq qulakkeerneqarsinnaagaluartoq. Peqquserluttuliortarnerup nunatsinni niueqatigiinnermut sunniuteqannginnissaa anguneqarsinnaavoq ersarissumik inuiaqatigiinnik ingerlatsinissaq anguniarlugu peqquserluttuliorneq pillugu paasissutissiinikkut, tamannalu Transparency International Greenlandip anguniagarpiaraa.